عامل أبهه

[صالح صلاح شبانة]

عامل أبهه
صورة محكية ساخرة
بقلم الداعي بالخير : صالح صلاح شبانة
( تم حذف البريد لأن عرضه مخالف لشروط المنتدى )
عامل بيك ، كاوي البدله ، منشّي القبَّه !!!
واقف مثل الأليف ، ملمع الكندره !!

حقك تعمل بيك ، تكوي البدله ، تنشّي القبه ،
توقف مثل الأليف ، تلمع الكندره

الناس مناظر، الناس مظاهر ، الناس من برّه ..
الله الله ، ومن جوه يعلم الله ، كيف يا ترى ؟؟

قالت ستي ، يرحم ستي ، الناس أجناس ،
بس ما بتلاقي القنبره غير عَ الحمير المدبره

إسم عالي ، وجوف خالي ، إن زحلق القرد في بطنه ،
بتلاقي عظام القرد مكسره

قالت ستي ، يرحم ستي ، ناس منفوخه عَ الفاضي ،
مش شبعانه من الكراديش والمجدره

وبتنفخ بالعالي ، وبتطلع بالعالي ، إتطالع المعالي ،
وشو جاب طز لمرحبا يا ترى ؟؟
عامل بيك ، وجختك محمضه ، وبتقول يا أرض اشتدي ،
ما عليك حدا قدّي ، وانت مسخم وحياتك معثره

ورزقتك يوم بيوم ، ولقمتك يوم طريه ، ويوم جافره ،
ويوم لا طريه ولا جافره ، عليك مقَفَّرَه

مش عيب ، قالت ستي ، يرحم ستي ، الدنيا مثل النوريه ،
يوم رّقاصه ، ويوم شحّاده مشرشره

بس لا تروح تشتري بحق الرغيف زُّمّاره ،ودف وطاره ،
وتطالع الناس المعتبره

قالت ستي ، يرحم ستي ، عَ الندّا الندّا ، زبّال وحامل ورده ،
وسحنته من الشقا مشحبره

عامل بيك ، حلّت البركه ،بيك بيك ، بس البكّوَنه ...
مش شوارب مبرّمه ولحيه معَطّره

قالت ستي ، يرحم ستي ، فكرنا الباشا باشا ،
طلع الباشا زلمه ، ومجاديفه مكسره
مش عيب ، تركب سيّاره ، تركب طياره ، بس العيب ،
إنك تنسى حمارة أبوك العرجا لِمّدَبَرَه ،

مش عيب تلبس بدله ‘ إتّطَقِمْ مثل ما بدك ، بس العيب ،
إنك تنسى صرماية أبوك لِمّقَعّوره

لما بقى يبصم عَ الأرض برجله ، وان دقته عُلّيقه ولاَّ قُنّديله ،
تنكسر ، يرحم أيام أبوك السُكَرَه

يرحم زمانه لِمّضمخ بعطرالمحبه ، يرحم نفسه ..
الطيبه ، ويرحم أيامه لِمّنَوّره

قالت ستي ، يرحم ستي ، ناس عندها إيثار ، واللي بثمها ...
مش إلها ، أيامها رحمه مقدّره

ناس عندها إيمان ، بحتمية الإنسان ، أصيله ...
من أصالة الأرض ، وما بتخلط الجد بالمسخره

وما بتنام عَ ظلم وغيظ ، قلوبها صافية مثل البنور ،
نورها ساطع ، بالإيمان معمّره
حقك تعمل بيك ، تعمل باشا ، تعمل معالي ، بس الألقاب .. ،
بدها مين يحملها عن جداره وعن قوه ومقدره
ألقاب بقت عَ أيام الترك ، وراحت مع الترك ، بس إحنا ....،
بنحب الجعصه ، والعنطزه والعنتره

بنحب الكذب والفشر وأبو فلان بالثم المليان ،وشيخ البلد ،
وعميد العيله ، وحارته فيه منّوَره

قالت ستي ، يرحم ستي ،يا شايف الزول ، يا خايب الرجا ،
طريقك خضره ، مفتوحه ما هي مسكره

يهديك ، ويعطيك لما يرضيك ، ويعافيك من مرض النفخه...،
و الجعصه ، ويمشيك مستقيم عَ المسطره

قالت ستي ، يرحم ستي ، بدال ما توكل رز وبيتنجان ، غطي جسمك العريان ، وارضى بالمقسوم ، واطلب المغفره

يا بيك ، الدنيا ما بتحتمل كل ناسها بكوات ، إرضى بنصيبك ،
وغير نصيبك ما بصيبك ، إذا بتأمن برب المغفره

تقرأ بلهجة أهل سنجل

[الحب المستحيل]

شكرا لك

[فرحان الحزين]

شكرا لك